D’Andeli Henri

France.( ?-?).
Henri d’Andeli, clerc d’origine normande (Andeli : Les Andelys) et poète ayant vécu à Paris (entre 1220 et 1240), auteur de La bataille des vins (ou Dit des vins de France) vers 1224, poème humoristique en 204 vers.
Cette bataille des vins se déroule à la table du roi de France Philippe-Auguste (1165-1223) où après avoir rassembler les meilleurs vins blancs de France, un prêtre anglais sélectionne les vins en chassant ou excommuniant les mauvais. Le roi de France couronne alors les vins restants en leur accordant un titre de pair de France (12 vins sélectionnés).
C’est le plus vieux classement des vins de France que l’on connaisse jusqu’à présent.


Volez oïr une grant fable
Qu’il avint l’autrier sus la table
Au bon roi qui ot non Phelippe,
Qui volentiers moilloit sa pipe
Du bon vin qui estoit du blanc ?
Il le senti gentil et franc,
Si le clamoit son ameor
Por le bien et por la douçor
Que li vins avoit dedenz soi ;
Li rois en but sanz avoir soi.
Li rois qui ert cortois et sages
Manda a trestoz ses messages
Qu’il alaissent le meillor querre
Qu’il trovaissent en nule terre.
Premiers manda le vin de Cypre,
Ce n’estoit pas cervoise d’ Ypre,
Vin d’ Aussai et de la Moussele,
Vin d’ Anni et de la Rocele,
De Saintes et de Tailleborc,
De Melans et de Treneborc,
Vin de Palme, vin de Plesence,
Vin d’ Espaingne, vin de Provence,
De Montpellier et de Nerbone,
De Bediers et de Quarquassone,
De Mossac, de Saint-Melÿon
Vin d’ Orchise et de Saint-ÿon
Vin d’ Orliens et vin de Jargueil,
Vin de Meulent, vin d’ Argentueil,
Vin de Soissons, vin d’ Auviler,
Vin d’ Espernai le Bacheler
Vin de Sezane et de .vij. mois,
Vin d’ Anjou et de Gastinois
D’ Ysoudun, de Chastel Raoul,
Et vins de Trie la Bardoul,
Vin de Nevers, vin de Sancerre,
Vin de Verdelai, vin d’ Auçuerre,
De Tornierre et de Flavingni,
De Saint-Porchain, de Savingni
Vin de Chablies et de Biaune,
.I. vin qui n’est mie trop jaune ;
Plus est vert que corne de buef :
Toz les autres ne prise .i. oef.
Trestuit vindrent en .i. conroi
Seur la table devant le roi.
Si comme Diex parla au cigne,
Chascuns des vins se fist plus digne
Par sa bonté, par sa poissance,
D’abevrer bien le roi de France.
Un prestre englois si prist s’estole,
Qui moult avoit la teste fole,
S’escommenïa Dans Mauvais
Qui estoit du clos de Biauvais,
Et Dant Petart de Chaalons
Qui le ventre enfle et les talons,
Et me sire Rogoel d’ Estampes
Qui amaine les goutes crampes :
Cil troi vin amainent la roingne.
A grant honte et a grant vergoingne,
Batant, ferant d’un baston cort,
Les amainent ferant a cort
Et lor dist que jamés n’entraissent
La ou nul preudomme hantaissent.
Les .ij. vins et de Biauvoisins
Et Dans Clermons li tiers voisins,
Ces .iij. vin n’en chaça il pas
Qu’il les senti de bon compas.
Li vin commun, li vin moien,
N’erent prisié .i pois baien.
Vin du Mans, de Tors retornerent
Por ce qu’a esté s’atornerent
Por la paor du prestre englois
Qui n’ot cure de lor jenglois.
Vin d’ Argenches, Chambeli, Renes,
S’en fuïrent tornant lor resnes,
Quar se li prestres les veïst,
Je croi bien qu’il les oceïst.
Primes parla vins d’ Argentueil
Qui fu clers comme lerme d’ueil,
Et dist qu’il valoit miex d’aus toz.
« Or te tais, filz a putain glouz, »
Ce dist li vins de Pierre frite,
« Tu jeues a la desconfite ;
Ices trives seront enfretes,
Je vail moult miex que vous ne fetes,
A tesmoing le vin de Marli,
De Duoeil, de Monmorenci. »
Lors dist bee sanc de Meulent :
« Argentueil, je sui moult dolent
Que tu despis tes compaignons.
Saches de voir nous en plaignons
Qui fez d’Auçuerre, de Soissons,
Le vin de l’autel de Tauçons,
Icil dui passent Vermendois,
Cil doivent bien seoir au dois. »
Esparnai dist a Aviler :
« Argentueil, trop veus aviler
Trestoz les vins de ceste table,
Par Dieu trop t’es fez connestable.
Nous passons Chaalons et Rains,
Nous ostons la goute des rains,
Nous estaignons toutes les sois. »
Dont saut en piez le vin d’Ausois,
Li bons gentiz vins et roiaus :
« Esparnai, trop es desloiaus,
Tu n’as droit de parler en cort,
Je sui cil qui la gent secort ;
Entre moi et ma damoisele,
Longue tonne de la Mosele,
Nous secorons les Alemanz,
Nous fesons trestoz noz commanz ;
Aus Coloingnois prenons l’argent
Dont nous repessons nostre gent. »
Lors dist li vins de la Rocele :
« Vous, Aussai, et vous, la Mousele,
Se vous paissiez cele gent fiere,
Je repais trestoute Engletiere,
Bretons, Flamens, Normans, Englois,
Et les Escos et les Irois,
Norois et cels de Danemarche :
Jusques la dure bien ma marche.
Je sui des vins li sebelins,
J’en aport toz les esterlins. »
Li vins Saint-Jehan d’Angeli
Si dist a Henri d’Andeli
Qu’il li avoit crevé les ex
Par sa force, tant estoit prex.
Engolesme, Bordiaus et Saintes,
Cil i firent bien lor empaintes,
Et le bon vin blanc de Poitiers
Qui n’a cure de charretiers :
C’est cil qui toute gent acroche
Par la froidure de sa roche.
Tant est fort que par son orgueil
Se fet costoier au soleil.
Ne sai qui en but plus qu’assez,
Par coi il ot les iex quassez.
Channi, Montrichart, Laçoy,
Chastel Raoul et Betesi,
Monmorillon et Ysoudun,
Et cil d’entor tout de commun,
Furent devant le roi tout cois
Por abatre le bobançois.
Vin françois bien se desfendoient
Et cortoisement respondoient :
« Se vous estes plus fort de nous,
Nous sommes sades, savorous ;
Si ne fesons nule tempeste
A cuer, n’a cors, n’a oeil, n’a teste.
Mes Vermendois, Saint-Brice, Auçuerre,
Si font les genz gesir au fuerre ! »
Qui la veïst vins estriver
Et chascun sa force aviver,
Et chascun mener son des roi
Sor la table devant le roi,
Ce n’est ore ne plus ne mains,
Se vins eüssent piez ne mains,
Je sai bien qu’il s’entretuaissent,
Ja por le bon Roi nel lessaissent.
Qui veïst comment estrivoient
Et com li vin estinceloient,
Si que la grant sale et la chambre
Sambloit plaine de basme et d’ambre.
Ce sambloit paradis terrestre,
Chascuns lechierre i vousist estre.
Chevaliers, clers, borgois, chanoine,
Contrait, muel, mesel et moine,
S’il hurtaissent a tel quintaine,
Jamés n’eüssent la quartaine.
Li rois du blanc bien se paia
Et chascun des vins essaia.
Li prestres englois i estoit
Qui volentiers les engorgoit,
Et a chascun donoit .i. baut
Et puis si disoit : « Yse baut
Bien, saint Thomas qui fu martin,
Goditouet, ci a bon vin ! »
Trestout seul lut cele leçon,
Guersoi dunque fu son clerçon ;
S’escommenïa la cervoise
Qui estoit fete dela Oise,
En Flandres et en Engleterre,
Puis geta la chandeille a terre,
Et puis si ala sommeillier
.iij. nuis, .iij. jors sanz esveillier.
Li rois les bons vins corona
Et a chascun son non dona :
Vin de Cypre fist apostoile
Qui resplendist comme une estoile,
Dont fist chardonal et legat
Du bon gentil vin d’Aquilat .
Puis fist .iij. rois et puis .iij. contes,
Et puis en dura tant li contes
Qu’il en fist .xij. pers en France
Ou li rois ot moult grant fïance.
Qui .i. des pers porroit avoir,
Ne por argent ne por avoir,
Desor sa table a son mengier,
Moult s’i feroit bon arengier :
Jamés maladie n’auroit
Jusques au jor que il morroit.
Qui miex ne puet si n’a pas tort,
Adés o sa vielle se dort ;
Soit vin moien, per ou persone,
Prenons tel vin que Diex nous done.